कासार सिरसी प्रतिनिधी:- कासार सिरसी येथील श्री करी बसवेश्वर विद्यालयात सेवक म्हणून कार्यरत असलेले गोपाळ धोंडीबा गायकवाड (रा. कोराळी) यांना रविवार, ५ एप्रिल रोजी पुणे येथील महात्मा फुले सांस्कृतिक भवन येथे महाराष्ट्र भूषण पुरस्कार 2026 प्रदान करण्यात आला. त्यांच्या या यशाबद्दल कासार सिरसी शहरातील साहित्यप्रेमी व नागरिकांकडून अभिनंदन करण्यात येत आहे.
गोपाळ गायकवाड यांनी लिहिलेली “मायबोले मरता मरता” ही कविता बंडखोर साप्ताहिकात प्रकाशित झाली होती. या कवितेची पुरस्कारासाठी निवड करण्यात आली. युवा प्रबोधन साहित्य मंच, बहुउद्देशीय संस्था व बंडखोर साप्ताहिक यांच्या संयुक्त विद्यमाने आयोजित कार्यक्रमात मान्यवरांच्या उपस्थितीत हा पुरस्कार प्रदान करण्यात आला. कार्यक्रमाचे अध्यक्ष सहाय्यक आयुक्त समाज कल्याण, पुणे श्री विशाल लोंढे यांच्या हस्ते पुरस्कार देण्यात आला.
या कवितेत त्यांनी आईच्या अंतिम क्षणांतील मातृत्व, मुलांप्रतीचे प्रेम आणि भावनिक नात्यांचे हृदयस्पर्शी चित्रण केले आहे. “स्त्री जन्मा तुझी कहाणी, हृदयी अमृत नयनी पाणी” अशा ओळींतून त्यांनी स्त्री जीवनातील वेदना आणि प्रेम यांचे प्रभावी दर्शन घडवले आहे. गायकवाड यांच्या साहित्यिक कार्याचे सर्वत्र कौतुक होत असून त्यांच्यावर अभिनंदनाचा वर्षाव होत आहे.