केज प्रतिनिधी :- केज येथील समस्त ब्राह्मण समाज आणि चतुर्वेद प्रतिष्ठानच्या वतीने दरवर्षीप्रमाणे यंदाही परशुराम जयंती निमित्त भव्य जन्मोत्सव सोहळ्याचे आयोजन करण्यात आले आहे. दि. १८ आणि १९ एप्रिल २०२६ या दोन दिवसांत धार्मिक, सामाजिक व प्रबोधनात्मक कार्यक्रमांची रेलचेल पाहायला मिळणार असून, शहरात उत्साहाचे वातावरण निर्माण झाले आहे.
शनिवार, दि. १८ एप्रिल रोजी सकाळी १० वाजता शुक्रवार पेठ येथील श्री बालाजी मंदिर येथे रांगोळी स्पर्धा आणि रक्तदान शिबिराने उत्सवाची सुरुवात होणार आहे. रांगोळी स्पर्धा दोन गटांत आयोजित करण्यात आली आहे—लहान गट (१० ते १७ वर्षे) आणि मोठा गट (१८ ते ४५ वर्षे). याच दिवशी सामाजिक बांधिलकी जपत रक्तदान शिबिराचेही आयोजन करण्यात आले आहे.
रविवार, दि. १९ एप्रिल रोजी दुपारी ३:३० वाजता शहरातील प्रमुख मार्गांवरून भव्य मोटारसायकल रॅली काढण्यात येणार आहे. ही रॅली वकीलवाडी येथील हनुमान मंदिर येथून सुरू होऊन छत्रपती शिवाजी महाराज चौक, भवानी चौक, डॉ. बाबासाहेब आंबेडकर चौक आदी मार्गांनी मार्गक्रमण करत श्री बालाजी मंदिर येथे समाप्त होईल.
सायंकाळी ५ वाजता भगवान परशुराम यांच्या प्रतिमेचे पूजन करण्यात येईल. त्यानंतर ह.भ.प. लक्ष्मण महाराज इनामदार यांचे ‘श्री भगवान परशुराम’ या विषयावर अभ्यासपूर्ण व्याख्यान होणार आहे. व्याख्यानानंतर विविध क्षेत्रात उल्लेखनीय कामगिरी करणाऱ्या विद्यार्थ्यांचा तसेच नवनियुक्त पदाधिकाऱ्यांचा सत्कार करण्यात येणार आहे. कार्यक्रमाची सांगता महाप्रसादाने होणार आहे.
हा जन्मोत्सव सोहळा यशस्वी करण्यासाठी समस्त ब्राह्मण समाज व चतुर्वेद प्रतिष्ठान, केजचे पदाधिकारी व कार्यकर्ते परिश्रम घेत असून, सर्व नागरिकांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.