कै. जगन्नाथ नारायण पाटील यांच्या सहाव्या पुण्यतिथीनिमित्त विद्यार्थ्यांना शालेय साहित्य वाटप.
माजी विद्यार्थ्यांचा आदर्श उपक्रम; मराठी शाळांच्या संवर्धनाचा दिला संदेश.
उरण, प्रतिनिधी : समाजाप्रती कृतज्ञता व्यक्त करत माजी विद्यार्थ्यांनी आपल्या शाळेचे ऋण फेडावे, याचा आदर्श घालून देणारा उपक्रम गोवठणे जिल्हा परिषद शाळेत पार पडला. राष्ट्रीय पुरोगामी पत्रकार संघाचे उरण तालुका उपाध्यक्ष तथा शिवधर्म वृत्तपत्राचे उपसंपादक निर्णय पाटील यांनी त्यांचे वडील कै. जगन्नाथ नारायण पाटील यांच्या सहाव्या पुण्यतिथीनिमित्त शाळेतील विद्यार्थ्यांना शालेय साहित्याचे वाटप केले. या उपक्रमाचे उपस्थित मान्यवरांनी कौतुक केले.
कार्यक्रमाच्या प्रारंभी राष्ट्रीय पुरोगामी पत्रकार संघाचे संस्थापक अध्यक्ष विजय सूर्यवंशी यांचा शाल व पुष्पगुच्छ देऊन सत्कार करण्यात आला. तसेच वाहतूक सेवा समितीचे महाराष्ट्र राज्य अध्यक्ष रवी नाईक यांच्यासह उपस्थित मान्यवरांचा सन्मान करण्यात आला.
कार्यक्रमाचे प्रास्ताविक करताना महेश वर्तक यांनी कै. जगन्नाथ नारायण पाटील यांच्या जीवनकार्याचा आढावा घेतला. गोवठणे जिल्हा परिषद शाळेचे माजी विद्यार्थी असलेले जगन्नाथ पाटील यांनी भारतीय नौदलात सेवा बजावत देशसेवा केली. सेवेनंतरही त्यांनी गावात आदर्श व्यक्तिमत्त्व म्हणून आपली ओळख निर्माण केली. त्यांच्या विचारांचा आणि समाजसेवेचा वारसा निर्णय पाटील व त्यांच्या पत्नी प्राची पाटील पुढे नेत असल्याचे त्यांनी सांगितले.
यावेळी रवी नाईक यांनी मराठी शाळांचे जतन व संवर्धन ही काळाची गरज असल्याचे सांगितले. मराठी माध्यमातून शिक्षण घेत अनेक विद्यार्थी विविध क्षेत्रांत मोठ्या पदांवर पोहोचले आहेत. त्यामुळे पालकांनी आपल्या पाल्यांना मराठी शाळांमध्ये प्रवेश देऊन मातृभाषेतील शिक्षणाला प्राधान्य द्यावे, असे आवाहन त्यांनी केले. तसेच निर्णय पाटील व प्राची पाटील यांच्या सामाजिक बांधिलकीचे कौतुक केले.
अध्यक्षीय भाषणात विजय सूर्यवंशी यांनी माजी विद्यार्थ्यांनी आपल्या शाळेचे ऋण फेडण्याची भावना समाजासाठी प्रेरणादायी असल्याचे सांगितले. शिक्षक, ग्रामस्थ आणि माजी विद्यार्थ्यांनी एकत्रितपणे काम केल्यास मराठी शाळांचे वैभव पुन्हा वाढू शकते, असा विश्वास त्यांनी व्यक्त केला. तसेच शाळा डिजिटल करण्यासाठी केलेल्या प्रयत्नांची माहिती देत मराठी शाळांच्या संवर्धनासाठी सर्वांनी पुढे यावे, असे आवाहन केले.
विद्यार्थ्यांना मार्गदर्शन करताना त्यांनी शिक्षणाचे महत्त्व अधोरेखित केले. “शिक्षण म्हणजे वाघिणीचे दूध; जो पितो तो गुरगुरल्याशिवाय राहत नाही,” असे सांगत त्यांनी विद्यार्थ्यांना शिक्षणासाठी प्रोत्साहित केले. राष्ट्रीय पुरोगामी पत्रकार संघ आणि शिवधर्म वृत्तपत्र शाळेच्या विकासासाठी कायम पाठीशी राहील, अशी ग्वाहीही त्यांनी दिली. कार्यक्रमाच्या शेवटी शाळेच्या शिक्षकांनी उपस्थित मान्यवरांचे आभार मानले. त्यानंतर कै. जगन्नाथ नारायण पाटील यांना भावपूर्ण श्रद्धांजली अर्पण करण्यात आली.
कार्यक्रमास राष्ट्रीय पुरोगामी पत्रकार संघाचे संस्थापक अध्यक्ष विजय सूर्यवंशी, वाहतूक सेवा समितीचे महाराष्ट्र राज्य अध्यक्ष रवी नाईक, रायगड जिल्हा कार्याध्यक्ष सचिन गायकवाड, जिल्हा उपाध्यक्ष दत्तू ठोके, जिल्हा सचिव राजपाल शेगोकार, उरण तालुका अध्यक्ष प्रवीण नाईक, तालुका सचिव अलंकार कडू, तालुका उपाध्यक्ष निर्णय पाटील, पोलीस मित्र समितीचे उरण तालुका अध्यक्ष महेश वर्तक, गोवठणे जिल्हा परिषद शाळेचे मुख्याध्यापक, शिक्षक, विद्यार्थी, पालक व ग्रामस्थ मोठ्या संख्येने उपस्थित होते.