नांदेड प्रतिनिधी,दि.१८:- नांदेड येथील कुसुमताई सभागृहात मीमांसा फाऊंडेशन, दै. समीक्षा, मंथन क्रिएटिव्ह ग्रुप, महाराष्ट्र राज्य मराठी पत्रकार संघ व पत्रकार प्रेस परिषद यांच्या संयुक्त विद्यमाने आयोजित एक भव्य सन्मान सोहळा पार पडला.
या कार्यक्रमात नांदेडचे पोलीस अधीक्षक अबिनाश कुमार यांनी यशस्वी वर्षपूर्ती पूर्ण केल्याबद्दल त्यांचा सपत्नीक सत्कार करण्यात आला.
यावेळी देगलूर पोलीस ठाण्यातील कर्तव्यदक्ष अधिकारी पोलीस निरीक्षक मारुती मुंडे, पोलीस उपनिरीक्षक नरहरी फड तसेच पोलीस अंमलदार राजवंतसिंग बुंगई यांना कर्तव्यदक्ष पोलिस अधिकारी व अंमलदार कृतज्ञता सन्मान पुरस्कार प्रदान करण्यात आला.
कार्यक्रमाला मान्यवर म्हणून खासदार रवींद्र चव्हाण, खासदार अजित गोपछडे, आमदार बाबुराव कदम, आमदार बालाजी कल्याणकर, आमदार अमर राजूरकर, श्री. नानासाहेब जावळेकर तसेच छावा संघटना महाराष्ट्र राज्याचे पदाधिकारी उपस्थित होते.
या सन्मान सोहळ्याबद्दल आयोजकांनी सर्व मान्यवरांचे मनःपूर्वक आभार मानले. तसेच विशेष सन्मानामुळे देगलूर पोलीस ठाण्याच्या कार्याची व्यापक प्रशंसा देखील होत आहे.