देगलूर प्रतिनिधी दि.०५ :-देगलूर शहरात पारंपरिक सार्वजनिक बतकम्मा सण उत्सव २०२५ भक्तिभाव, सांस्कृतिक रंगत आणि उत्साहाच्या वातावरणात पार पडला. श्री. मोगलाजी अण्णा शिरशेटवार मित्र मंडळ यांच्या वतीने दरवर्षी आयोजित होणारा हा सण आता देगलूरच्या सांस्कृतिक ओळखीचा अविभाज्य भाग ठरला आहे.
शहरातील माता-भगिनी तसेच अनेक स्त्री-पुरुषांनी मोठ्या संख्येने उपस्थित राहून बतकम्मा सजावट स्पर्धा, भक्तिगीते, महिलांसाठी विविध स्पर्धा व सांस्कृतिक कार्यक्रमांमध्ये सहभाग घेतला. रंगीबेरंगी फुलांच्या बतकम्मा आणि पारंपरिक पोशाखांनी संपूर्ण परिसर उजळून निघाला.
कार्यक्रमास खासदार रविंद्र वसंतराव चव्हाण यांचे प्रतिनिधी सोनियाताई रविंद्र चव्हाण प्रमुख पाहुण्या म्हणून उपस्थित होत्या. आयोजक मंडळाच्या वतीने त्यांचा शाल, पुष्पहार आणि स्मृतिचिन्ह देऊन सत्कार करण्यात आला.
उत्सवावेळी उपस्थितांसाठी चहा, फराळ आणि अल्पोपहाराची व्यवस्था करण्यात आली होती. स्वच्छतेसाठी नगरपरिषदेच्या सफाई कर्मचाऱ्यांनी तत्परतेने काम करून परिसर स्वच्छ ठेवला. तसेच ॲम्बुलन्स सेवा, फायर ब्रिगेड व पोलीस प्रशासन यांनी सज्जतेने व्यवस्था सांभाळली. कार्यक्रमादरम्यान कुठलाही अनुचित प्रकार घडू नये यासाठी विशेष खबरदारी घेण्यात आली.
विद्युत रोषणाई आणि आकर्षक सजावटीमुळे परिसर उजळून निघाला होता. भक्तिगीतांच्या गजरात महिलांनी बतकम्मा पूजन करून श्रद्धा, संस्कृती आणि सामाजिक ऐक्याचा सुंदर संदेश दिला.
तेलंगणा आणि आंध्र प्रदेश या राज्यांतील प्रमुख परंपरेपैकी एक असलेला बतकम्मा सण आता मोगलाजी अण्णा शिरशेटवार यांच्या प्रयत्नाने देगलूरमध्येही भव्यदिव्य स्वरूपात साजरा होऊ लागला आहे.
कार्यक्रमाच्या यशस्वी आयोजनासाठी संपूर्ण प्रशासकीय यंत्रणेसह स्वयंसेवकांनी स्वतःला झोकून दिले, हे विशेष उल्लेखनीय ठरले.