उद्घाटन तेलंगणा राज्याचे मुख्यमंत्री मा. श्री. रेवंत रेड्डी यांच्या हस्ते होणार
हैदराबाद प्रतिनिधी : – श्री छत्रपती शिवाजी महाराज मराठा सांस्कृतिक ट्रस्टच्या वतीने उभारण्यात आलेल्या “मराठा भवन” या वास्तूच्या उद्घाटन सोहळ्याचे आयोजन रविवार, 26 एप्रिल 2026 रोजी सायंकाळी 5 वाजता करण्यात आले आहे.
मराठा भवन जलपल्ली, हैदराबाद येथे हा भव्य सोहळा पार पडणार असून तेलंगणातील मराठी बांधवांमध्ये या कार्यक्रमाबाबत मोठा उत्साह पाहायला मिळत आहे.
या सोहळ्याचे उद्घाटन तेलंगणा राज्याचे मुख्यमंत्री मा. श्री. रेवंत रेड्डी यांच्या हस्ते होणार आहे. तसेच तेलंगणा राज्याचे परिवहन मंत्री मा. श्री. पूनम प्रभाकर हे प्रमुख पाहुणे म्हणून उपस्थित राहणार आहेत.
कार्यक्रमास तेलंगणा प्रदेश काँग्रेस कमिटीचे अध्यक्ष मा. श्री. महेश गौड, काँग्रेस पक्ष तेलंगणाचे प्रभारी मा. श्री. सचिन सावंत, राज्यसभेचे खासदार मा. श्री. वेम नरेंद्र रेड्डी तसेच हैदराबादच्या राजेंद्रनगर मतदारसंघाचे आमदार मा. श्री. प्रकाश गौड यांची विशेष उपस्थिती लाभणार आहे.
मराठा भवन हे तेलंगणातील मराठी समाजासाठी एक सांस्कृतिक, सामाजिक आणि शैक्षणिक केंद्र म्हणून विकसित करण्यात येत असून या वास्तूमुळे मराठी भाषिक बांधवांना एकत्र येण्यासाठी स्वतंत्र व्यासपीठ उपलब्ध
होणार आहे. त्यामुळे या उद्घाटन सोहळ्याला तेलंगणातील सर्व मराठी बांधवांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन आयोजकांनी केले आहे.
उद्घाटन सोहळ्यानंतर विविध मनोरंजनपर कार्यक्रमांचे आयोजन करण्यात आले आहे. दुपारी 3 ते 6 या वेळेत खेळ पैठणीचा हा विशेष कार्यक्रम आयोजित करण्यात आला आहे. त्यानंतर सायंकाळी 6 वाजता प्रसिद्ध लावणी सम्राज्ञी
राधा पाटील मुंबईकर यांच्या लावणी कार्यक्रमाचे आयोजन करण्यात आले आहे. तसेच हैदराबाद येथील मित्रागण ढोल-ताशा पथकाचा देखील कार्यक्रमात समावेश करण्यात आला आहे.
कार्यक्रमासाठी येणाऱ्या पाहुण्यांसाठी दुपारचे तसेच सायंकाळचे जेवणाची व्यवस्था आयोजकांकडून करण्यात आली आहे.
या कार्यक्रमाचे आयोजन श्री छत्रपती शिवाजी महाराज मराठा ट्रस्ट, हैदराबाद यांच्या वतीने करण्यात आले असून कार्यक्रमाच्या यशस्वी आयोजनासाठी मा. विनोद पवार, मा. अक्षय अर्जुन, मा. भाऊ कोडगे, मा. धनाजी भोसलें, मा. संपत गावडे, मा. सचिन निकम आणि मा. बंडू शेठ सावंत हे प्रायोजक म्हणून कार्यरत आहेत.
कार्यक्रमाचे समन्वयक म्हणून सचिव मा. मदन जाधव व खजिनदार मा. प्रकाश पाटील हे काम पाहत आहेत.