केकतसारणी येथे ७ मे रोजी ‘राष्ट्र चिंतन अभियान’ अंतर्गत विशेष चर्चासत्र.
केज प्रतिनिधी :- केज तालुक्यातील केकतसारणी येथे हिंदराष्ट्र ऑर्गनायझेशनच्या वतीने ‘राष्ट्र चिंतन अभियान’ अंतर्गत गुरुवार, ७ मे २०२६ रोजी विशेष चर्चासत्राचे आयोजन करण्यात आले आहे. कृषी, आरोग्य आणि शिक्षण या महत्त्वपूर्ण विषयांवर या कार्यक्रमात सखोल चर्चा व मार्गदर्शन होणार आहे.
हे चर्चासत्र केकतसारणी येथील मारुती मंदिर सभागृहात सकाळी ९ ते ११ या वेळेत आयोजित करण्यात आले असून, प्रमुख अतिथी म्हणून महर्षी गज अरविंदजी उपस्थित राहणार आहेत. त्यांच्या मार्गदर्शनाचा लाभ परिसरातील नागरिकांना मिळणार आहे.
कार्यक्रमात कृषी, आरोग्य आणि शिक्षण क्षेत्रातील विविध मान्यवर आपली मते मांडणार आहेत. यासोबतच नागरिकांच्या शंका निरसनासाठी विशेष प्रश्नोत्तर सत्राचेही आयोजन करण्यात आले आहे. उपस्थित नागरिकांना आपले प्रश्न थेट मांडण्याची संधी उपलब्ध होणार आहे.
राष्ट्र उभारणीत कृषी, आरोग्य आणि शिक्षण हे तीन महत्त्वाचे आधारस्तंभ असून, या विषयांबाबत जनजागृती व्हावी आणि नागरिकांच्या समस्यांना व्यासपीठ मिळावे, या उद्देशाने या चर्चासत्राचे आयोजन करण्यात आल्याची माहिती हिंदराष्ट्र संघाच्या महाराष्ट्र प्रदेश उपाध्यक्षा सौ. राधाताई सपकाळ यांनी दिली.
या महत्त्वपूर्ण चर्चासत्राला केकतसारणी व परिसरातील नागरिकांनी मोठ्या संख्येने उपस्थित राहावे, असे आवाहन आयोजकांनी केले आहे.