देगलूरच्या शासकीय पशुवैद्यकीय दवाखान्यास कै. अजितदादा पवार यांचे नाव देण्याची मागणी; प्रशासनाची हालचाल सुरू.
देगलूर प्रतिनिधी :- देगलूर तालुक्यात नव्याने बांधण्यात आलेल्या शासकीय पशुवैद्यकीय दवाखान्यास उपमुख्यमंत्री कै. अजितदादा पवार यांचे नाव देण्यात यावे, अशी मागणी सामाजिक कार्यकर्ते धनाजी जोशी यांनी केली असून या मागणीची प्रशासनाने दखल घेतल्याचे समोर आले आहे.
यासंदर्भात धनाजी जोशी यांनी दि. २ फेब्रुवारी २०२६ रोजी तालुका लघु पशुवैद्यकीय सर्व चिकित्सालय, देगलूर कार्यालयाकडे निवेदन सादर केले होते. त्यानंतर सहाय्यक आयुक्त, पशुसंवर्धन व दुग्धव्यवसाय विभाग यांनी दि. १ जून २०२६ रोजी जिल्हा उपआयुक्त, पशुसंवर्धन व दुग्धव्यवसाय यांना पत्र पाठवून देगलूर येथील नव्याने बांधण्यात आलेल्या पशुवैद्यकीय दवाखान्यास कै. अजितदादा पवार यांचे नाव देण्याबाबत कळविले आहे.
तसेच या प्रस्तावाबाबत पुढील कार्यवाहीसाठी जिल्हाधिकारी व जिल्हा परिषदेचे मुख्य कार्यकारी अधिकारी यांच्याकडे पाठपुरावा करण्याच्या सूचना देण्यात आल्याची माहिती धनाजी जोशी यांना प्राप्त झालेल्या पत्रातून समोर आली आहे.
याबाबत बोलताना धनाजी जोशी यांनी सांगितले की, या मागणीस मंजुरी मिळावी यासाठी लवकरच जिल्हाधिकारी व जिल्हा परिषदेच्या मुख्य कार्यकारी अधिकाऱ्यांची भेट घेऊन पाठपुरावा करण्यात येणार आहे. देगलूर तालुक्यातील पशुपालकांच्या दृष्टीने महत्त्वाच्या असलेल्या या दवाखान्यास कै. अजितदादा पवार यांचे नाव देण्याची मागणी लवकरच मार्गी लागेल, अशी अपेक्षा त्यांनी व्यक्त केली.
