देगलूर प्रतिनिधी, दि. २८ :- ‘शंकर कुद्रेज स्पोकन इंग्लिश’ हे पुस्तक अत्यंत उपयुक्त असल्यामुळे हे पुस्तक प्रत्येक शिक्षक व विद्यार्थ्याने अभ्यासावे, असे आवाहन माजी शिक्षण संचालक डॉ. गोविंद नांदेडे यांनी केले. शंकर कुद्रे यांच्या ४ पुस्तकांच्या प्रकाशन समारंभात प्रमुख वक्ते म्हणून ते बोलत होते. कार्यक्रमाच्या अध्यक्षस्थानी आ. जितेशभाऊ अंतापूरकर हे होते.
शंकर कुद्रे यांच्या ‘संदेश’, ‘सारे प्रेमासाठी’, ‘फुले वेचताना’, ‘स्पोकन इंग्लिश’ या चार पुस्तकांचे प्रकाशन डॉ. गोविंद नांदेडे आणि सुप्रसिध्द साहित्यिक डॉ. सुरेश सावंत यांच्या हस्ते संपन्न झाले.
प्रमुख पाहुणे म्हणून माजी नगराध्यक्ष मोगलाजीराव शिरशेटवार , बालाजी थोटवे, एच.एस.खंडागळे, शिक्षण विस्तार अधिकारी डी. के.तोटरे , बस्वराज पाटील हे उपस्थित होते. आद्यशिक्षिका सावित्रीबाई फुले यांच्या प्रतिमेचे पूजन आणि गंगाधर वाघमारे यांच्या संविधान गीताने कार्यक्रमाची सुरुवात झाली . शंकर कुद्रे यांनी चार पुस्तकांच्या लेखनासंदर्भात प्रास्ताविक मनोगत व्यक्त केले.
ऑनलाईन शिक्षणाचा लाभ घेतलेली विद्यार्थिनी कु. संजीवनी बेंजलवार हिने इंग्रजी पुस्तकाविषयी आपला अभिप्राय नोंदविला. शेख फैज आणि संतोष राऊत यांनीही समयोचित मनोगत व्यक्त केले. बालाजी थोटवे यांनी ‘फुले वेचताना’ या समीक्षाग्रंथाबद्दल विवेचन केले. एच.एस. खंडागळे यांनी इंग्रजी पुस्तकाबद्दल इंग्रजीतून विचार मांडले.
डॉ. सुरेश सावंत यांनी शंकर कुद्रे यांची चारही पुस्तके आणि कुद्रे यांचा जिज्ञासू विद्यार्थी म्हणून झालेला प्रवास याविषयी श्रोत्यांशी संवाद साधला. उत्तम वाचक ते उत्तम समीक्षक हा कुद्रे यांचा प्रवास उलगडून दाखविला . शिक्षकांवर प्रभाव टाकणारा विद्यार्थी अशा शब्दांत डॉ. सावंत यांनी शंकर कुद्रे यांचा गौरव केला.
माजी शिक्षण संचालक डॉ. गोविंद नांदेडे यांनी शिक्षणाची आजची परिस्थिती बदलण्यासाठी तळमळीने मार्गदर्शन केले. प्रत्येक शाळेत, प्रत्येक शिक्षक व विद्यार्थ्यांपर्यंत स्पोकन इंग्लिश हे पुस्तक पोहोचलेच पाहिजे,यासाठी प्रयत्न करण्याचा सल्ला दिला.
विचारमंचावरील उपस्थित मान्यवरांच्या हस्ते सर्व पाहुणे, मित्र परिवाराकडून कुद्रे दाम्पत्याचा सत्कार करण्यात आला. या कार्यक्रमात उपायुक्त डॉ. माधव लोकडे, डॉ. विनायक मुंडे, डॉ. उत्तमकुमार इंगोले, प्राचार्य डॉ. हिंगोले, प्रा.उत्तमकुमार कांबळे, मानवी हक्क अभियानचे मा.मच्छिंद्र गवाले, शेतकरी नेते मा.कैलास येसगे, प्रा.शेरीकर, पांडुरंग पुठ्ठेवाड, लक्ष्मण मलगिरवार, स्वच्छता निरीक्षक मा.मारोती गायकवाड, प्रकाश तोटरे, उत्तमराव व या कार्यक्रमाचे सूत्रसंचालन बालाजी पेटेकर यांनी केले. शंकर कुद्रे यांनी आभारप्रदर्शन केले. सुरुची भोजनानंतर कार्यक्रमाची गोड सांगता झाली.
