‘मराठवाडा भूषण पुरस्कार’ साठी सगरोळी येथील ‘संस्कृती संवर्धन मंडळ’ची निवड
सगरोळी प्रतिनिधी, दि.:-२९ मराठवाडा समन्वय समिती, पुणे यांच्यावतीने दरवर्षी आयोजित केला जाणारा ‘हैद्राबाद मुक्ती दिन’ अथवा ‘मराठवाडा मुक्ति दिन महोत्सव २०२४’ यावर्षी १७ सप्टेंबर रोजी भव्यदिव्य पद्धतीने साजरा होणार आहे. या कार्यक्रमात विविध क्षेत्रांतील मान्यवरांना
‘मराठवाडा भूषण पुरस्कार’ देऊन गौरविण्यात येणार असून, यावर्षीचा सन्मान सगरोळी (जि. नांदेड) येथील ‘संस्कृती संवर्धन मंडळा’ला जाहीर करण्यात आला आहे.
‘संस्कृती संवर्धन मंडळ, सगरोळी’ ही संस्था १९५९ पासून ग्रामीण भागात शिक्षण, कौशल्य विकास, शेती व पर्यावरण संवर्धन यासारख्या अनेक क्षेत्रांत उल्लेखनीय कामगिरी करत आहे. प्राथमिक शिक्षणापासून उच्च शिक्षणापर्यंत
जवळपास २०० एकर क्षेत्रात कार्यरत असलेल्या या संस्थेच्या उपक्रमांमुळे लाखो विद्यार्थी घडले असून, समाजकारणात त्यांनी भरीव योगदान दिले आहे.
‘मराठवाडा भूषण पुरस्कार’ प्रदान सोहळा रविवार, दि. १५ सप्टेंबर २०२४ रोजी, सायं. ५.३० वा., बाळ गंधर्व रंगमंदिर, पुणे येथे पार पडणार आहे. या कार्यक्रमास पुणे व परिसरातील मान्यवरांसह हजारो नागरिक उपस्थित राहणार आहेत.
मराठवाडा समन्वय समिती, पुणेचे अध्यक्ष राजकुमार धुरगूडे पाटील यांनी सांगितले की, “सगरोळी येथील संस्कृती संवर्धन मंडळाने शिक्षण व ग्रामीण विकासात केलेल्या कार्यामुळे संस्था समाजासाठी प्रेरणादायी ठरली आहे. हा सन्मान त्यांना अर्पण करताना आम्हाला अभिमान वाटतो.”