देगलूर : नवरात्रोत्सवाच्या निमित्ताने परमपूजनीय गोळवलकर गुरुजी माध्यमिक विद्यालयात विविध क्षेत्रांत कार्यरत असलेल्या स्त्रीशक्तींचा सन्मान करून ‘नवदुर्गांना’ वंदन करण्यात आले.
कार्यक्रमाच्या अध्यक्षस्थानी भारतीय शिक्षण प्रसारक संस्थेच्या सदस्या व माध्यमिक शालेय समितीच्या सदस्या डॉ. शिलाताई आलुरकर होत्या. सुरुवातीला देवी प्रतिमेचे पूजन करण्यात आले. विद्यालयाचे मुख्याध्यापक माधव जोशी यांनी प्रास्ताविक केले.
डॉ. शिलाताई आलुरकर यांच्या हस्ते पो. उपनिरीक्षक किरण बेंबडे, स्त्रीरोगतज्ञ डॉ. कांचन येरमुने, प्रा. संजिवनी नेरकर, ॲडव्होकेट मुक्ता सुवर्णकार, बस कंडक्टर शैला देशमुख, पोस्टमन कविता घंटेवार, हॉटेल व्यवसायिका संगिता टेकमाळे, न.प. स्वच्छता कामगार रुक्मिणबाई भंडारे, गृहीणी अंबिका कुलकर्णी व आस्थापना कामगार रेणुका उपलंचवार या नऊ महिलांचा शाल, पुष्पगुच्छ व पुस्तक देऊन गौरव करण्यात आला.
या प्रसंगी पाहुण्यांनी मार्गदर्शनपर मनोगते व्यक्त केली. डॉ. कांचन येरमुने यांनी विद्यार्थ्यांनी छंद जोपासण्याचे महत्त्व पटवून दिले. प्रा. संजिवनी नेरकर यांनी “नवरात्र म्हणजे जागे राहून लक्ष्याकडे वाटचाल करणे” असे सांगितले. पोलीस उपनिरीक्षक किरण बेंबडे यांनी विद्यार्थिनींना मोबाईल व तंत्रज्ञानाचा योग्य वापर करून स्वावलंबी होण्याचे आवाहन केले.
अध्यक्षीय समारोपात डॉ. आलुरकर यांनी “केल्याने होत आहे रे आधी केलेची पाहिजे” या उक्तीचा आधार घेत कठोर परिश्रमाने यश संपादन करण्याचे आवाहन विद्यार्थ्यांना केले.
कार्यक्रमाचे सूत्रसंचालन श्रीमती राधिका पांचाळ यांनी केले तर आभार श्रीमती रचिता पांगरे यांनी मानले. सामूहिक कल्याणमंत्राने कार्यक्रमाची सांगता झाली. या उपक्रमाच्या यशस्वीतेसाठी विद्यालयातील सर्व शिक्षक व शिक्षकेतर कर्मचाऱ्यांनी परिश्रम घेतले.