AI आधारित ऊस प्रक्षेत्र भेट व परिसंवाद सगरोळीत उत्साहात संपन्न.

AI आधारित ऊस प्रक्षेत्र भेट व परिसंवाद सगरोळीत उत्साहात संपन्न.

सगरोळी (ता.बिलोली):

संस्कृती संवर्धन मंडळाच्या कृषी विज्ञान केंद्र, सगरोळी व व्हीपीके उद्योग समूह यांच्या संयुक्त विद्यमाने २५ सप्टेंबर २०२५ रोजी आयोजित करण्यात आलेला “ऊस पिक परिसंवाद व AI (कृत्रिम बुद्धिमत्ता) आधारित प्रक्षेत्र भेट कार्यक्रम” मोठ्या उत्साहात पार पडला.

कार्यक्रमाच्या अध्यक्षस्थानी संस्कृती संवर्धन मंडळाचे चेअरमन श्री. प्रमोद देशमुख होते, तर प्रमुख उपस्थिती व्हीपीके समूहाचे अध्यक्ष मारोतराव पाटील कवळे (गुरुजी) यांची लाभली.

AI चा ऊस शेतीत प्रभावी वापर करून उत्पादन वाढ व निविष्ठा खर्चात कशी बचत करता येते, यावर तज्ञांनी सखोल मार्गदर्शन केले.

ऊस पिकासाठी पंचसूत्री माहिती, योग्य तंत्रज्ञानाचा वापर आणि व्यवस्थापनाचे महत्त्व शेतकऱ्यांना समजावून सांगण्यात आले.

व्हीपीके उद्योग समूहाकडून ऊस व दुग्ध उत्पादक शेतकऱ्यांसाठी उपलब्ध योजनांची माहिती देण्यात आली.

शाश्वत ऊस खरेदीची हमी देण्यात आली, ज्यामुळे शेतकऱ्यांचा विश्वास अधिक दृढ झाला.

कार्यक्रमानंतर शेतकऱ्यांनी AI आधारित ऊस प्रक्षेत्राला भेट देऊन प्रत्यक्ष तंत्रज्ञान, सेन्सर्स, डेटा विश्लेषण आणि त्याचा शेतीतील उपयोग समजून घेतला.

श्री. मनोज गाडेगावकर (जनरल मॅनेजर, व्हीपीके उद्योग समूह) श्री. एस. जे. सावंत व श्री. पडवळे (ऊस विकास अधिकारी) प्रा. कपिल इंगळे (कृषी विज्ञान केंद्र, सगरोळी) यांनी शेतकऱ्यांना ऊस शेतीतील नवतंत्रज्ञान, बाजारपेठेतील बदल, शाश्वत शेती व दुग्ध व्यवसायाच्या संधी याबाबत मार्गदर्शन केले.

या कार्यक्रमात सगरोळी व पंचक्रोशीतील २०० हून अधिक शेतकऱ्यांनी उत्स्फूर्त सहभाग नोंदवला. शेतकऱ्यांनी कार्यक्रमाबद्दल समाधान व्यक्त करत AI तंत्रज्ञानाच्या वापराने शेतीत नवे दालन खुलण्याची आशा व्यक्त केली.