देगलूरला बाह्य वळण रस्ता द्या; केंद्रीय मंत्री नितीन गडकरींकडे धनाजी जोशी यांची मागणी.
देगलूर प्रतिनिधी : नांदेड जिल्ह्यातील उपजिल्हा असलेल्या देगलूर शहरातील वाढत्या वाहतूक कोंडीच्या समस्येवर कायमस्वरूपी उपाय म्हणून बाह्य वळण रस्ता (बायपास) उभारण्याची मागणी सामाजिक कार्यकर्ते धनाजी जोशी यांनी केंद्रीय रस्ते वाहतूक व महामार्ग मंत्री Nitin Gadkari यांच्याकडे केली आहे.
देगलूर हे महाराष्ट्र, तेलंगणा आणि कर्नाटक या तीन राज्यांच्या सीमेवरील महत्त्वाचे शहर असून रेणापूर–उदगीर राष्ट्रीय महामार्ग तसेच नांदेड–हैदराबाद मार्गाला जोडणारे प्रमुख केंद्र आहे. त्यामुळे दररोज हजारो वाहने शहरातून प्रवास करतात. परिणामी शहरात मोठ्या प्रमाणात वाहतूक कोंडी होत असून नागरिकांना त्याचा त्रास सहन करावा लागत आहे.
या संदर्भात धनाजी जोशी यांनी 24 मार्च 2025 रोजी केंद्रीय मंत्र्यांकडे निवेदन दिले होते. त्यानंतर 13 जून 2025 रोजी भारतीय राष्ट्रीय महामार्ग प्राधिकरण (NHAI) व रस्ते वाहतूक महामार्ग मंत्रालयाकडून पत्र प्राप्त झाले. या पत्रात देगलूर शहरातून जाणारा राष्ट्रीय महामार्ग क्रमांक 161 सध्या राज्य सार्वजनिक बांधकाम विभागाच्या अखत्यारीत असल्याचे नमूद करण्यात आले आहे.
तसेच नांदेड–हैदराबाद कॉरिडॉरमधील नांदेड–देगलूर–महाराष्ट्र-तेलंगणा सीमा या अपूर्ण पट्ट्यासाठी सविस्तर प्रकल्प अहवाल (DPR) तयार करण्याचा प्रस्ताव विचाराधीन असल्याचे सांगण्यात आले आहे. या डीपीआरच्या निकषांनुसार देगलूर शहरासाठी बाह्य वळण रस्ता विकसित करण्याबाबत निर्णय घेतला जाऊ शकतो, असेही पत्रात स्पष्ट करण्यात आले आहे.
सध्या सार्वजनिक बांधकाम विभागामार्फत नांदेड–नरसी मार्गाचे अंशतः चौपदरीकरण आणि नरसी–देगलूर मार्गाचे दुपदरीकरण करण्यात आले आहे. नांदेड–नरसी 43 किमी चौपदरीकरण तसेच नरसी–देगलूर 34 किमी दुपदरीकरण प्रकल्पांची मुदत 2 नोव्हेंबर 2036 पर्यंत असल्याची माहितीही संबंधित पत्रात देण्यात आली आहे.
देगलूर शहरात वाढती वाहनसंख्या, मोठ्या प्रमाणावरील वाळू वाहतूक आणि सततची वाहतूक कोंडी लक्षात घेता बायपास रस्ता अत्यावश्यक असल्याचे धनाजी जोशी यांनी सांगितले. यासाठी लोकप्रतिनिधींनीही पुढाकार घेऊन शहरवासीयांना वाहतूक कोंडीतून दिलासा मिळवून देण्यासाठी प्रयत्न करावेत, अशी अपेक्षाही त्यांनी व्यक्त केली.
देगलूर शहराच्या बाह्य वळण रस्त्याबाबत आता नागरिकांचे लक्ष शासनाच्या पुढील निर्णयाकडे लागले आहे.