उदगीर प्रतिनिधी, दि.०४:- लातूर जिल्ह्यातील उदगीर तालुक्यातील लोहाराजवळ महामंडळाच्या बस आणि
कारचा भीषण अपघात होऊन पाच जण जागीच ठार झाले असल्याचे वृत्त आहे. तर एक जण गंभीर जखमी झाला आहे. ही दुर्दैवी घटना आज मंगळवार ०४ ऑक्टोबर रोजी सकाळी
घडली असल्याचे स्पष्ट झाले.
उदगीर आगाराची एसटी बस उदगीरहुन चाकूरकडे निघाली होती. तर एम एच २४ एबी ०४०८ ही स्विफ्ट डिजायर कार उदगीरकडे येत होती. मात्र उदगीर-लातूर महामार्गावरील लोहारा गावाजवळ गुळगे मिलच्या जवळ एसटी आणि कारची भीषण टक्कर झाली. अपघात एवढा भीषण होता की कार मधील पाच जण जागीच ठार झाले. तर एक जण गंभीर जखमी झाला आहे.
या भीषण अपघात अलोक तानाजी खेडक, रा. संत कबीर नगर – उदगीर, अमोल जीवनराव देवक्तते-रा. रावनकोळा, कोमल व्यंकट कोदरे-रा.डोरणाळी ता.मुखेड,जि. नांदेड, यशोमती जयवंत देशमुख रा. यवतमाळ, नागेश ज्ञानेश्वर गुंडेवार रा.बिदर रोड, उदगीर यांचा अपघातात जागीच मृत्यू झाला आहे. तर प्रियांका गजानन बनसोडे रा. गोपाळ नगर-उदगीर ह्या गंभीर जखमी झाल्या आहेत.
कार आणि बस दोन्ही वेगात असल्यामुळे हा अपघात झाल्याचे बोलले जात आहे. अपघातानंतर स्विफ्ट डिझायर कारचा अक्षरशः चेंदा-मेंदा झाला होता. तर घटनास्थळी रक्ता-मांसाचा अक्षरशः सडा पडला होता. घटनास्थळी उदगीरचे उपविभागीय पोलीस अधिकारी डॅनियल बेन, उदगीर शहर पोलीस, उदगीर ग्रामीण पोलीस ठाण्याचे अधिकारी कर्मचारी घटनास्थळी दाखल झाले होते.
पोलिसांनी घटनास्थळाचा पंचनामा करून सर्व मृतदेह शवविच्छेदनासाठी उदगीरच्या सामान्य उपजिल्हा रुग्णालयात पाठवले.
