नांदेड प्रतिनिधी :- नांदेड पोलीस दलाच्या स्थानिक गुन्हे शाखेला नवे नेतृत्व लाभले असून अनुभवी पोलीस अधिकारी अतुल श्रीधर भोसले यांनी पदभार स्वीकारला आहे. त्यांच्या नियुक्तीमुळे शाखेच्या कार्यक्षमतेत अधिक वाढ होण्याची अपेक्षा व्यक्त केली जात आहे.
अतुल श्रीधर भोसले यांनी यापूर्वी नवी मुंबई, पुणे ग्रामीण, सोलापूर ग्रामीण तसेच एसीबी पुणे येथे उल्लेखनीय कार्यकाळ पूर्ण केला आहे. सोलापूर ग्रामीण येथे स्थानिक गुन्हे शाखेत तसेच वळसंग पोलीस ठाण्यात प्रभारी अधिकारी म्हणून त्यांनी जबाबदारी सांभाळली. पुणे ग्रामीणमध्ये दौंड आणि शिक्रापूर पोलीस ठाण्यांमध्येही त्यांनी प्रभावी कामगिरी बजावली.
गुन्हे प्रतिबंधक कारवाईत त्यांनी विशेष ठसा उमटवला आहे. दोन किंवा त्यापेक्षा अधिक गुन्ह्यांमध्ये सहभागी असलेल्या सराईत गुन्हेगारांवर प्रभावी कारवाई करत त्यांनी “टू प्लस आरोपी” संकल्पना राबवली. आरोपींचा मागोवा घेण्यासाठी स्वतंत्र वेबसाईट आणि अॅप विकसित करून आधुनिक तंत्रज्ञानाचा वापर पोलीस यंत्रणेत प्रभावीपणे आणला. ही प्रणाली संपूर्ण महाराष्ट्रात लागू करण्यासाठी त्यांनी महत्त्वाची भूमिका बजावली.
सध्या गेल्या दोन वर्षांपासून ते नांदेड पोलीस दलात कार्यरत असून त्यांच्या नेतृत्वाखाली स्थानिक गुन्हे शाखेचे काम अधिक वेगाने आणि तंत्रज्ञानाधिष्ठित पद्धतीने पुढे जाईल, असा विश्वास व्यक्त केला जात आहे. त्यांच्या अनुभवाचा फायदा गुन्हे नियंत्रण आणि तपास प्रक्रियेला निश्चितच होणार आहे.