देगलुरचे सामाजिक कार्यकर्ते धनाजी जोशी यांना राज्यस्तरीय ‘समाजरत्न’ पुरस्कार जाहीर.
देगलुर प्रतिनिधी : देगलुर शहरातील विविध सामाजिक प्रश्नांवर सातत्याने लढा देत जनतेचा आवाज बुलंद करणारे सामाजिक कार्यकर्ते धनाजी जोशी यांना यंदाचा प्रतिष्ठेचा राज्यस्तरीय ‘समाजरत्न पुरस्कार’ जाहीर झाला आहे. राज्यभर कार्यरत असलेल्या दैनिक लोकनेता वृत्तपत्राच्या वतीने दरवर्षी दिला जाणारा हा पुरस्कार यंदा त्यांच्या उल्लेखनीय सामाजिक कार्याची दखल घेत प्रदान करण्यात येत आहे.
देगलुर येथील मोडकळीस आलेल्या जुन्या बसस्थानकाच्या पुनर्बांधणीसाठी त्यांनी संभाजीनगर उच्च न्यायालयात याचिका दाखल करून प्रशासनाला बांधकाम सुरू करण्यास भाग पाडले होते. तसेच शासकीय पशुवैद्यकीय दवाखान्याची दुरवस्था दूर करून नवीन इमारतीच्या उभारणीसाठी पाठपुरावा केला. खासगी रुग्णालयांमध्ये होणाऱ्या रुग्णांच्या आर्थिक लुटीविरोधात आवाज उठवत दरपत्रक लावण्याची मागणीही त्यांनी प्रभावीपणे केली होती.
धनाजी जोशी हे मागील पंधरा वर्षांपासून सामाजिक क्षेत्रात सक्रिय असून, देगलुरातील विविध जनसामान्यांच्या प्रश्नांवर त्यांनी सातत्याने आवाज उठवला आहे. सामाजिक, राजकीय, शैक्षणिक आणि आरोग्य क्षेत्रातील अनेक गंभीर विषय त्यांनी निर्भीडपणे मांडले. त्यांच्या कार्यशैलीत सत्य, वस्तुनिष्ठता, निःपक्ष भूमिका आणि वंचित घटकांच्या प्रश्नांप्रती असलेली बांधिलकी हे विशेष ठरले आहे.
दैनिक लोकनेता वृत्तपत्राच्या वर्धापन दिनानिमित्त हा पुरस्कार जाहीर करण्यात आला असून, येत्या १० मे रोजी GVT कृषीकुल, शिरसाळा (जि. बीड) येथे आयोजित राज्यस्तरीय पुरस्कार सोहळ्यात मान्यवरांच्या हस्ते धनाजी जोशी यांचा सन्मान करण्यात येणार आहे.
पुरस्कार जाहीर होताच देगलुरातील सामाजिक, राजकीय, आरोग्य, विधी तसेच विविध क्षेत्रातील मान्यवरांनी त्यांचे अभिनंदन करून शुभेच्छांचा वर्षाव केला आहे.