वर्तमानपत्रात खाद्यपदार्थ देण्यावर बंदीची मागणी; देगलूरकर नागरिकांची सोशल मीडियातून हाक.
देगलूर प्रतिनिधी : देगलूर शहरातील अनेक हॉटेल, उपाहारगृहे व खाद्यपदार्थ विक्री केंद्रांमध्ये आजही वर्तमानपत्राच्या कागदात खाद्यपदार्थ देण्याची प्रथा सुरू असल्याचे दिसून येत आहे. या प्रकारामुळे नागरिकांच्या आरोग्याला धोका निर्माण होत असल्याने अन्न व औषध प्रशासनाने याकडे गांभीर्याने लक्ष देऊन तात्काळ कारवाई करावी, अशी मागणी सोशल मीडियाच्या माध्यमातून नागरिकांकडून करण्यात येत आहे.
नागरिकांचे म्हणणे आहे की, वर्तमानपत्रावरील शाई व रासायनिक घटक खाद्यपदार्थांमध्ये मिसळून आरोग्यावर विपरीत परिणाम होऊ शकतात. त्यामुळे खाद्यपदार्थ पॅकिंग व वितरणासाठी वर्तमानपत्राचा वापर पूर्णपणे बंद करण्यात यावा.
अलीकडेच आयुक्त तुकाराम मुंडे यांनी नागरिकांच्या आरोग्याशी संबंधित बाबींमध्ये कोणतीही तडजोड न करण्याचा स्पष्ट संदेश दिल्यानंतर देगलूरमधील नागरिकांनीही या विषयाकडे प्रशासनाचे लक्ष वेधले आहे. यापूर्वीही अनेक वेळा वर्तमानपत्रातून खाद्यपदार्थ देऊ नयेत, अशी मागणी करण्यात आली होती. मात्र नांदेड जिल्ह्यातील संबंधित यंत्रणांकडून या बाबीकडे अपेक्षित गांभीर्याने लक्ष दिले गेले नसल्याची भावना नागरिकांमध्ये व्यक्त होत आहे.
सोशल मीडियावर अनेक नागरिकांनी अन्न व औषध प्रशासन, स्थानिक स्वराज्य संस्था आणि संबंधित विभागांनी संयुक्त तपासणी मोहीम राबवून नियमांचे उल्लंघन करणाऱ्या आस्थापनांवर कारवाई करावी, अशी मागणी केली आहे.
नागरिकांच्या आरोग्याच्या दृष्टीने हा विषय अत्यंत महत्त्वाचा असून प्रशासनाने आयुक्तांच्या सूचनांचा विचार करून तात्काळ पावले उचलावीत, अशी अपेक्षा नागरिक व्यक्त करीत आहेत.